Ummæli forsætisráðherra um gjaldmiðilinn

Birt by

Ég spurði í dag Jóhönnu Sigurðardóttur út í ummæli hennar um íslensku krónuna sem hún lét falla á fundi Samfylkingarinnar um síðustu helgi. Þar sagði hún efnislega að gjaldmiðillinn væri ónothæfur.

Þessi ummæli forsætisráðherra koma í kjölfar mikillar veikingar krónunnar að undanförnu og eru til þess fallin að veikja enn frekar gengi krónunnar og minnka tiltrú allra á gjaldmiðlinum. Ef gengið veikist þá hækka lán heimila enn frekar og kaupmáttur mun minnka. Hvergi fengi forystumaður þjóðar að komast upp með slík ummæli – enda átti Steingrímur J. erfitt með að réttlæta ummælin á Alþingi í dag.

Það er nauðsynlegt að fara yfir möguleika okkar í gjaldmiðilsmálum og það erum við framsóknarmenn að gera. En eitt er ljóst að krónan verður okkar gjaldmiðill á næstu árum. Því er það skylda forsætisráðherra að tala okkar máli -frekar en að tala gengi krónunnar niður. Nóg er nú samt af gengisfalli og stökkbreyttum lánum almennings.

Erfið staða leigjenda

Birt by

Frá hruni hefur fólki á leigumarkaði fjölgað mikið. Húsaleigan hefur hækkað gríðarlega. Á sama tíma hafa húsaleigubætur hækkað sáralítið.

Ég hef óskað eftir sérstakri umræðu við velferðarráðherra um þessi mál á Alþingi. Fólk á leigumarkaði hefur verið vanrækt og staða margra þar óviðunandi. Vonandi mun þessi umræða varpa ljósi á stöðu mála og leiða til úrræða þeim til handa. Algjört stefnuleysi virðist ríkja um fólk á leigumarkaðnum.

Hvað er að gerast í Fjármálaeftirlitinu?

Birt by

Eftir atburði síðustu daga þá hef ég óskað eftir fundi í efnahags- og viðskiptanefnd um stöðu Fjármálaeftirlitsins (FME). Að stjórn FME komi á fund nefndarinnar til að skýra frá stöðu mála. Það er ólíðandi að óvissa ríki um starfsemi og trúverðugleika þeirrar stofnunar sem á að fylgjast með starfsemi fjármálamarkaðarins.

Tekjur ríkisins af eldsneyti í hæstu hæðum og heimsmet í skattlagningu á barnaföt!

Birt by

Ég var með fyrirspurnir á Alþingi í dag um eldsneytisverð og virðisaukaskatt af barnafötum. Í stuttu máli voru svör fjármálaráðherra þau að ekki standi til að lækka álögurnar. Ítrekað kom fram í svari ráðherra hvað þessar aðgerðir kostuðu mikið en um leið var ekki bent á hvaða ávinningur væri samhliða minni álögum á almenning og fyrirtækin.

Eldsneytisverðið hækkar og hækkar en eftirspurnin minnkar, sem þýðir minnkandi tekjur ríkissjóðs. Virðisaukaskattur á barnaföt er sá hæsti í heimi og því fer fólk í æ meira mæli erlendis til að kaupa þá nauðsynjavöru. Sem þýðir færri störf í verslun og aukið gjaldeyrisútstreymi.

Ríkisstjórnin hefur því miður ekki séð ljósið að hóflegar álögur og skattar geti aukið umsvif og tekjur ríkis og sveitarfélaga.

Fátt kemur nú í raun á óvart þegar um stefnu ríkisstjórnarinnar er að ræða og hvers vegna árangurinn er líkt og raun ber vitni. Við gætum verið í mun betri málum sem þjóð ef kolrangri stefnu væri ekki beitt. Þetta er Ísland í dag – en örugglega ekki þjóðfélag framtíðarinnar.

Jöfnum lífskjörin

Birt by

Í kjördæmaviku þingmanna sem nú er nýliðin gafst okkur tækifæri til þess að hitta fólk víðsvegar um landið á opnum fundum. Á fundum okkar þingmanna Framsóknarflokksins komu fram tillögur og spurningar um hvernig hægt væri að jafna lífskjörin í landinu. Það hvílir sú skylda á stjórnvöldum að tryggja að grunnþjónusta sé fyrir hendi. Niðurskurður síðustu ár í velferðar-, mennta- og löggæslumálum, svo nokkuð sé nefnt, hefur vegið að grundvelli margra byggðarlaga vítt og breitt um landið. Sú stefna ríkisstjórnarinnar og embættismanna að „taka til“ í þessum málaflokkum hefur og mun að óbreyttu veikja landsbyggðina. Lesa meira →